محام تحت التمرين فى مكتب المحاماة

طريقة تقسيم الميراث

بنتعرض احيانا فى ظرف طارئ لو لاقدر الله حصل ان فى احد من العائلة قد توفاه الله وترك للعائلة تركة وهى ميراث لهم ولكنهم ايضاً لا يعلموا طريقة تقسيم تلك التركة او ايضاً حتى لو انه لايوجد ميراث او شئ فيجب ايضاً ان يكن معهم اعلام شرعي ( اعلام وراثة ) ليكون لهم الحق بالتعامل بإسم المتوفى مجتمعين او منفردين فيما يخص المتوفى من اوراق ومستندات حكومية فيبادروا برفع دعوى اعلام وراثة بمحكمة الاسرة ( احوال شخصية ) ولكن عليهم ان يعلموا جيدا من لهم الحق من افراد العائلة فى هذا الميراث ولا يغفلوا عن احد يحق له نصيب من ذلك الميراث حتى لايقعوا تحت طائلة القانون.

قبل مانعرف طريقة تقسيم الميراث لازم نعرف ونحدد مين اللى ليه حق انه يورث فى الميراث ده.

وكمان فيه مسميات انت لازم تعرفها قبل ما أبدأ معاك عرض الموضوع عشان تفهم بكل سهولة الموضوع ده.

ركز معايا كدة

اولاً: الاصول:-

الاصول هي عبارة عن الاشخاص اللى المتوفى جاى من صلبهم اى هم ( الاباء - الاجداد - اباء الاجداد ......)

ثانياً:- الفروع:-

الفروع هم الاشخاص الذين يربطهم صلة قرابة بالمتوفي بإختلاف دراجتهم بتبدأ ب ( الابناء - ابناء الابناء - الاحفاد - وماينزل عنهم ويليهم الاخوة وابناءهم ثم يليهم الاعمام وابناءهم .

نيجي بقا لنقطة تانية وهي مين اللى ليه الحق انه يورث :-

بص انا هاقسمهملك على مرحلتين :-

المرحلة الاولى :- الاشخاص اللى لو موجودين بعد الوفاة لازم يورثوا

المرحلة التانية :- الاشخاص اللى لو موجودين بعد الوفاة وماينفعش يورثوا لوجود ( حاجب )

1- الاشخاص اللى لو موجودين بعد الوفاة لازم يورثوا :-

الزوج - الزوجة - الابناء ( ذكور وإناث ) - الاب - الام

تقسيمة الميراث للاشخاص دول هاتكون كالتالي :-

1- الزوج :- نصيبه من الميراث

* 1/2 فى حالة عدم وجود فرع وارث

* 1/4 في حالة وجود فرع وارث

2- الزوجة :- نصيبها من الميراث

* 1/4 فى حالة عدم وجود فرع وارث

* 1/8 في حالة وجود فرع وارث

3- الابن ( ذكر ) :- نصيبه من الميراث

يرث بالتعصيب بعد تقسيم التركة بمعنى ان كل شخص يستحق الميراث وله نصيب يتم التقسيم ويأخذ الابن الباقى تعصيبا

4- الابنة ( انثى ):- نصيبها من الميراث

* 1/2 فى حالة انها تكون وحيدة ليس لها اخوة

* 2/3 فى حالة وجود اكثر من اخت ( اناث )

* تعصيب بالغير اذا كان يوجد اخوة ذكور واناث ( للذكر مثل حظ الانثيين )

5- الاب :- نصيبه من الميراث

*1/6 فى حالة وجود فرع وارث ذكر طب انا عندي فروع كتير اى فرع منهم يعنى اللى انا اقصده هاقولك ياسيدى الفرع هنا اللى انا اقصده هو الابناء

*1/6+الباقي من التركة فى حالة وجود فرع وراث مؤنث

* يأخذ الباقى بالتعصيب  فى حالة عدم وجود فروع

6- الام :- نصيبها من الميراث

* 1/6 فى حالة وجود فرع وارث ( ذكر - انثى ) او وجود اكثر من اخت للمتوفى

* 1/3 في حالة عدم وجود فرع وارث

* 1/3 باقى التركة بعد طرح نصيب الزوج أوالزوجة ( المسألة العمرية )

كدة احنا خلصنا عالأشخاص اللى هايورثوا فى جميع الاحوال لو موجودين بعد وفاة الشخص اللى هايورثوه

نخش بقا عالجزء الاصعب شوية

2- الاشخاص اللى لو موجودين بعد الوفاة وماينفعش يورثوا لوجود ( حاجب ) بس ينفع يورثوا لو مافيش حاجب:-

الجد - الجدة - الاخت الشقيقة - بنت الابن - الاخوة والاخوات لام - الاخوة والاخوات لأب

تقسيمة الميراث للاشخاص دول هاتكون كالتالي:-

1- الجد :- نصيبه من الميراث هو نفس نصيب الاب من التركة فى حالة عدم وجود الاب

*1/6 فى حالة وجود فرع وارث ذكر

*1/6+الباقي من التركة فى حالة وجود فرع وراث مؤنث

* يأخذ الباقى بالتعصيب  فى حالة عدم وجود فروع مطلقاً

2- الجدة:- ترث فى حالة عدم وجود الام أو الاب ولكن الام تحجب الجدة من جهة الام ومن جهة الاب ايضا اما الاب يحجب الجدة من جهة الاب فقط ونصيب الجدة من الميراث

*1/6  ترثه الجدة الواحدة ولو تعددوا يقسم عليهم بالتساوي.

3- الاخت الشقيقة:- نصيبها من الميراث

الاخت الشقيقة ترث فقط في حالة عدم وجود الابن وابن الابن وان نزل وبالاب ايضاً ويكون نصيبها من التركة كالتالي:-

*1/2 فى حالة عدم وجود شقيق لها يعصبها

* 2/3 اذا كانت اكثر من اخت

*تعصيب مع الغير اى تأخذ باقى التركة في حالة وجود فرع وارث ( انثى ) " ابنة - بنت الابن "

*تعصيب بالغير اذا كان يوجد اخوة ذكور واناث ( للذكر مثل حظ الانثيين )

4- بنت الابن :- ترث فى حالة عدم وجود الابن والبنتين وابن الابن وبنت الابن الاعلى منها درجة ويكون نصيبها فى الميراث كالتالي :-

* 1/2 اذا كانت وحيدة

* 2/3 اذا كانت اكثر من واحدة ولم يكن لها اخوة ( ذكور )

* 1/6 اذا كان يوجد معها بنت او بنت ابن اعلى منها درجة

* تعصيب بالغير اذا كان يوجد معها ابن ابن فى نفس الدرجة ( للذكر مثل حظ الانثيين )

5- الاخوة والاخوات لأم :لهم نصيب من الميراث فى حالة عدم وجود فرع وارث ذكر او انثى  وايضاً عدم وجود الاب والجد ولكن لا تحجب الام نصيبهم من الميراث ويكون نصيبهم فى تلك الحالة كالتالي :-

* 1/6 اذا كان أخ لأم او أخت لأم

*1/3 اذا كانوا اكثر من اخ وات لافرق بين ذكر كان او انثى 

6-الاخوة والاخوات لأب :- لا يرثوا الا فى عدم وجود فرع وارث ( الابناء وابناء الابناء والاب والاخ الشقيق والاختين الشقيقتين فأكثر وايضا فى حالة عدم وجود اخت شقيقة واحدة ولكن معها بنت المتوفى او بنت ابن المتوفى) ويكون نصيبهم من الميراث

*1/2 اذا كانت وحيدة 

*2/3 اذا كانت اكثر من اخت لأب ولو يوجد معهم اخ

* 1/6 اذا كان يوجد اخت شقيقة للمتوفى 

* بالتعصيب فى حالة وجود اخ لأب ( للذكر مثل حظ الانثيين )

* الباقي بالتعصيب فى حالة وجود بنت او بنت ابن المتوفى 

وبكدة نكون قد انتهينا من شرح تقسم التركة والميراث لكل الاشخاص اتمنى تكونوا قد استفدتم من الشرح ويكون بطريقة سهلة تقدروا انكوا تفهموها بسهولة 

اتمنى ان يحوز المقال على اعجابكم وان اكون قد وفقت في شرح الموضوع بالتفصيل لكم 

ان اعجبك الموضوع برجاء مشاركته مع الاصدقاء والطلاب الذين يدرسونه حتى تعم الفائدة 

ولا تنسوا الاشتراك بالمدونة النور والمنى لمتابعة كل جديد

لكم منى التحية والتقدير

والسلام عليكم ورحمة الله وبركاته ,,,,,,