خطوات استرجاع موبايل مسروق
تليفوني اتسرق !!!!
اعمل ايه ؟؟؟؟؟
كترت الفترة دى حوارات سرقة التليفونات " الموبايلات " اكيد
حد مننا عدى بالموقف ده سواء معاه شخصياً او مع حد من قرايبه او حتى حد يعرفه وكمان البنات لان الموضوع بالنسبالهم صعب شويتين عشان خصوصيتهم اللى بتكون فى الموبايلات عشان كدة بقولك انتى هاتتخذى اجراءاتك فى استرجاع موبايلك العادية زي اى حد بس بس لو لاقدر الله حد كلمك حاول انه يبتزك بأى نوع من الانواع بتعملى خطوات تانية ممكن تعرفيها من هنا
انت تقدر تعمل ايه لو انت موبايلك اتسرق او حد جالك وقالك والله
موبايلى اتسرق ومش عارف اعمل ايه
اول حاجة هاتيجي فبالك وقتها هاتقوله معاك علبته " علبة او
كارتونة الموبايل " لو قالك اه اكيد مش هاتقوله ارميها مالهاش لازمة 😂😂😂 طبعاً امر سخيف انا عارف لانه بيكون ياعيني شايل هم وقتها طبعا وعاوز موبايله
يرجعله وخصوصاً ان سوق الموبايلات " الجوالات " دلوقتي الاسعار مش اللى
هي رخيصة لبعض الناس فأنا هاروح اشري تليفون اكيد مش هاشتري حاجة ضعيفة انا هاشترى
حاجة كويسة وعلى قد امكانياتى المادية بس السعر مش رخيص نسبياً
طيب انا دلوقتي مش هاشترى تليفون " موبايل " جديد ماعنديش امكانية
وقدامي عدة كويسة بس مستعملة وسعرها كويس جدا كدة احنا هانخش على اساس موضوعنا
اللى هانتكلم فيه اللى هو ازاى ارجع تليفونى المسروق ؟؟؟
ها ازاى ؟
انا هجاوبك حالا على سؤالك ده ، بس قبل ماتسأل السؤال ده لازم تكون
حاطط فبالك شوية حاجات لو متوفرة معاك يبقى بإذن الله نسبة رجوع تليفونك 90%:-
1-
يكون معاك علبة
الموبايل ، طب ليه يكون معايا علبة الموبايل اقولك انا ياسيدي هو انا بكتبلك
الموضوع ليه يعني مش عشان اعرفك كل حاجة ولا ايه .
علبة التليفون تعتبر هي سند ملكيتك للموبايل ده لأن الحكومة مابتتعاملش
الا بالورق وعلى رأى ( عادل امام ) بلد بتاعت شهادات صحيح ..
علبة الموبايل عليها رقم اللى يعتبر هو الرقم القومي للموبايل ده او
هو بصمات التليفون ده كل واحد فينا ليه بصمات غير التاني فالرقم ده هو الحاجة اللى
بتميز التليفون ده عن غيره من التليفونات الرقم المسلسل ( serial number) .
2-
ان يكون الموبايل وقت
السرقة كان شغال وفيه شريحة (خط) تابع لأى شركة اتصالات سواء (فودافون – وي –
اورانج - اتصالات...) لأن بيتم مخاطبة
الشركات دى اللى هايكون رقم الخط او الشريحة بتاعتك تابعة ليها ولازم يردوا على
الخطاب ده لأنه خطاب رسمى من النيابة العامة .
الخطوات اللى انت هاتبدأ ان انت تعملها بالترتيب عشان تضمن استرجاع
تليفونك بدون اى استغلال من حد:-
1-
ياريت ماتتوجهش لأى
قسم شرطة وتعمل محضر بسرقة التليفون او فقده هي اه خطوة مهمة جداً انك تروح لقسم
الشرطة وتعمل محضر بس أنا هاقولك على طريقة هاتوفر عليك وقت ومجهود وهاتكون اسرع وأدق
فى تنفيذ الاجراءات طب بسرعة يا استاذ ابراهيم قولنا ايه هي هاقولك ياعم ماتستعجلش
بص ياسيدى انت هاتتصل على الرقم ده 25771755 /
25798166 ده رقم المباحث العامة للاتصالات هاتقولهم عاوز اعرف مكان مباحث
الاتصالات / التليفونات المختصة بمطقتك / دايرتك فى العرف القانونى قسم الشرطة
بيبقى مسئول عن دائرة هايقولك تتوجه لمباحث كذا وهايقولك عنوانهم وارقام التليفونات
الخاصة بيهم للتواصل وأى استفسار انت عاوزه .
2-
هاتحضر
معاك علبة التليفون وهاتكون مصور ضهر
العلبة اللى بيبقى مكتوب عليه السيريال نمبر بتاع التليفون ، هاتصور بطاقتك
الشخصية وهايكون معاك اى ملحقات للتليفون كمان هاتثبتها ف المحضر وتكون حافظ رقم
الخط اللى موجود في الموبايل عشان هايسألوك عنه
3-
هاتتوجه
للمباحث هاتقولهم ان تليفونك اتسرق منك هايوجهوك لمكتب الشخص اللى هايكتبلك المحضر
هاتكلمه وتشرحله الموضوع كله واتسرق امتى وفين وكدة وهياخد منك الاوراق والمستندات
اللى قولتلك تحضرهم معاك فى البند رقم 2
4-
بعد
ماتعمل المحضر واثبت فيه كل حاجة بتاخد رقم المحضر ده وتحتفظ بيه بس ياسيدي انت
كدة خلصت .
5-
اه
نسيت اقولك انك بتسيب رقم تليفون ليك عشان يتواصلوا معاك لو حصل اى جديد فى موضوعك
6-
لو
انت من النوع اللى ممكن تسعى ورا الموضوع وتتابع مجرياته وايه اللى حصل فيه وكدة
يبقى تعمل الآتي ياسيدى :-
·هاترجع للمباحث بعد
حوالى 4 او 5 ايام هاتدخل للموظف اللى عملك المحضر هاتقوله عاوز اعرف ايه اللى
بيتم فى المحضر هايوجهك على مكتب اسمه الصادر والوارد هاتخل جوا هاتقولهم عاوز رقم
الصادر للمحضر رقم ...... هايفتح الدفتر ويدورلك برقم المحضر وبيكون متسجل عنده رقم
المحضر وتاريخه هايديك رقم الصادر وتاريخه واتصدر لقسم شرطة ايه.
·انت هاتسكت على كدة
طبعا لأ هاتتوجه لقسم الشرطة برقم المحضر ورقم الصادر وتاريخه بس ده طبعا بعد كام
يوم كدة يكون المحضر وصل القسم هاتدخل على مكتب الصادر والوارد هاتقولهم عملت محضر
فى المباحث وده رقمه واتصدر للقسم هنا بتاريخ كذا ورقم صادر كذا هايقولك اه ده جه
فى تاريخ كذا برقم وارد كذا انت عاوز ايه منه هاتقوله انا عاوز الرقم المحضر اللى
هاتابع بيه فى النيابة هايديك الرقم.
·هاتسكت لأ طبعاً بعد
كام يوم هاتطلع على النيابة ودي بتكون فى المحكمة المختصة بقسم الشرطة ده كل محكمة
بيكون فيها نيابة هاتخش على حاجة اسمها الجدول وبكون في حالتك جدول الاداري
هاتسألهم برقم المحضر اللى اخذته من القسم ايه اللى حصل هايقولك لسة مافيش جديد
تعالى بعد اسبوع كدة
· ماتسكتش انت بقا
بقولك اهو هاتروح تاني تسأل هايقولك ده راح للمحامي العام عشان يتعمل تتبع
للموبايل برقم الشريحة ورقم المسلسل بتاعه هاتقوله تمام راح امتى ورقمه ايه وكدا (
يعني رقم صادر وتاريخه عشان تقدر تتابع بيهم ) فى النيابة الكلية وهاتسأل الموظف
على مكانها فين .
· هاتروح النيابة
الكلية وهتتعامل هناك كأنك عارف كل حاجة عشان ماحدش يضحك عليك هاتخش على الجدول
والله ياجماعة انا عامل محضر رقمه كذا واتقيد برقم كذا واتبعت هنا بتاريخ كذا ورقم
صادر كذا هتلاقيه بيقولك رقم كذا ايه تاني يا استاذ هاتقوله بقا انت على الرقم
اللى هو عاوزه وهايطلبه منك وهو هايفتح دفتر ويقولك بإسم محمد / عمر / سيد / مريم
/ زينب / منى اياً كان هايقولك اسمك وهايقولك ايه اللى حصل فيه وغالباً هايكون لسة
شركة المحمول لسة ماردتش .
نصيحة منى ماتعملش كل ده لأن هى كل الحكاية مسألة وقت لكن انت اصبر الموضوع
كله هايتوقف على ان التليفون اتفتح بعد السرقة واشتغل او اتحط فيه شريحة تانية ولا
لأ لأن شركات المحمول بتتبع التليفون عن طريق كدة فأنت اصبر وده مايمنعش انك تروح
وتسأل لأ طبعاً روح واسأل و اتطمن بس كل فترة وفترة يعني بعد شهر مثلاً روح
المباحث اللى اروحتها اول مرة تعمل فيها المحضر واسألهم ايه اللى تم وكدا.
ان شاء الله اول مايتم العثور على التليفون بيتصلوا بيك عشان تروح
تستلمه بكل سهولة شوية اجراءات روتينية مش
اكتر هاتعملها وهاتستلم تليفونك وتمشي بس اول ماتستلمه اعمله اعادة ضبط مصنع او
تهيئة عشان لو الشخص اللى كان معاه التليفون عامله ايميل ومسجله بيه تعرفه منه
وتشغل تليفونك فوراً
اتمنى ان يحوز المقال على اعجابكم وان اكون قد وفقت في شرح الخطوات بالتفصيل لكم
ان اعجبك الموضوع برجاء مشاركته مع الاصدقاء حتى تعم الفائدة ولننقذ مايمكن انقاذه ولتشجيع اى شخص اتسرق منه موبايله انه مايفقدش الامل ويبدأ يمشى فى الاجراءات دى عشان يرجعله حقه
ولا
تنسوا الاشتراك بالمدونة النور والمنى لمتابعة كل جديد
لكم منى التحية والتقدير
والسلام عليكم ورحمة الله وبركاته ,,,,,,
شكرا لك
ردحذفعفوا تحت امرك
حذف